Kalaja

Kalaja e Beratit përfaqëson një monument historik ku gjurmët e qytetërimeve mbivendosen dhe historia e shkruar gjen dëshmi të prekshme nga antikiteti deri në fund të periudhës otomane. Themelet e saj datojnë në shekullin e IV p.e.s dhe muret e saj mbajnë gjurmë nga periudha ilire, romake, bizantine dhe otomane. Ajo ka një sipërfaqe prej gati 10 hektarësh dhe një perimetër prej 1400 metrash. Brenda kalasë  ndodhet një lagje me rreth 300 banorë, duke e bërë kështu atë një vend të rrallë që ende pulson jetë prej lashtësisë.